Ilmiy kengash

Farg‘ona jamoat salomatligi tibbiyot institutida Ilmiy kengashning navbatdagi yig‘ilishi bo‘lib o‘tdi

Joriy yilning navbatdagi Ilmiy kengash yig‘ilishi Farg‘ona jamoat salomatligi tibbiyot institutida bo‘lib o‘tdi. Mazkur yig‘ilishga institut rektori, professor Akmal Sidikov raislik qildi.

Yig‘ilish avvalida professor A. Sidikov kun tartibidagi masalalarni e’lon qilgan holda, institutda olib borilayotgan islohotlar, xususan, ta’lim sifatini oshirish, raqamlashtirish jarayonlarini jadallashtirish va ilg‘or boshqaruv tizimlarini joriy etish borasidagi dolzarb vazifalarga alohida to‘xtaldi.

Yig‘ilishda muhokama qilingan asosiy masalalardan biri – ta’lim jarayonlarini raqamlashtirish va baholash tizimini elektron shaklga to‘liq o‘tkazish masalasi bo‘ldi. Xususan, yangi o‘quv yilidan boshlab barcha qoidabuzarliklar, davomat, reyting natijalari va boshqa tegishli hujjatlarni yagona oliy ta’lim axborot tizimi – HEMIS orqali yuritish belgilandi.

Shu bilan birga, fakultet dekanlariga yozgi ta’til davrida o‘quv jarayonini HEMIS tizimiga to‘liq integratsiya qilish, ya’ni talabalar ro‘yxati, fanlar, o‘zlashtirish ko‘rsatkichlari va boshqa zaruriy ma’lumotlarni tizimga to‘liq kiritish bo‘yicha aniq vazifalar yuklatildi. Kafedralar esa o‘zlarining dars materiallari, jumladan, ma’ruza matnlarini platformaga muntazam joylab borishlari shartligi ta’kidlandi.

Mazkur tizimni samarali boshqarish maqsadida HEMIS platformasi ustidan to‘liq nazorat qilish vakolati institutning **“Registrator ofisi”**ga topshirildi. Shuningdek, tizim doirasida xodimlar va talabalar salomatligini monitoring qilish imkonini beruvchi maxsus bo‘lim tashkil etish taklifi ilgari surildi. HEMISdan foydalanish bo‘yicha xodimlarning salohiyatini oshirish maqsadida maxsus o‘quv kurslari tashkil etilishi rejalashtirilgan.

Bundan tashqari, talabalar bilimini baholash tizimini takomillashtirish, xususan, test savollarini klinik fikrlashga asoslangan holda qayta ishlab chiqish zarurligi ta’kidlab o‘tildi. Bu o‘z navbatida zamonaviy tibbiy ta’lim talablariga muvofiq ravishda baholash mexanizmlarini takomillashtirishga xizmat qiladi.

Yig‘ilish yakunida institut ilmiy salohiyatini oshirish borasida faoliyat yuritayotgan professor-o‘qituvchilar, ilmiy daraja va unvon olgan pedagog xodimlar tantanali tarzda taqdirlandi.