Aholi salomatligi yo‘lida

Farg‘ona jamoat salomatligi tibbiyot instituti rektori boshchiligida institutning professor-o‘qituvchilari hamda malakali mutaxassis shifokorlari tomonidan Quvasoy shahrida aholiga bepul tibbiy xizmatlar ko‘rsatish ishlari izchil davom ettirilmoqda. Mazkur xayriya va profilaktik yo‘nalishdagi tashabbus aholi salomatligini mustahkamlash, kasalliklarni erta aniqlash, tibbiy madaniyatni oshirish hamda ijtimoiy himoyaga muhtoj qatlamlarni qo‘llab-quvvatlashga qaratilgani bilan ahamiyatlidir.

Tadbir davomida shahar aholisi turli yo‘nalishlar bo‘yicha tajribali shifokorlar tomonidan ko‘rikdan o‘tkazildi. Jumladan, umumiy terapevtik ko‘rik bilan bir qatorda, tor soha mutaxassislari tomonidan ham maslahatlar berilib, fuqarolarning sog‘lig‘i bo‘yicha murojaatlari batafsil tinglandi. Shifokorlar tomonidan dastlabki tashxis va tavsiyalar berilib, zarur holatlarda qo‘shimcha tekshiruvlar, laborator va instrumental tahlillar o‘tkazish, shuningdek, keyingi davolanish yoki reabilitatsiya jarayonlarini tashkil etish bo‘yicha yo‘naltirishlar berildi.

Ko‘rik jarayonida fuqarolarga kasalliklarning oldini olish, xususan yurak-qon tomir, qandli diabet, nafas yo‘llari, ovqat hazm qilish tizimi hamda mavsumiy xastaliklarning profilaktikasi bo‘yicha tushuntirishlar olib borildi. Shuningdek, sog‘lom turmush tarzini shakllantirish, to‘g‘ri ovqatlanish, jismoniy faollikni oshirish, zararli odatlardan voz kechish, shaxsiy gigiyena qoidalariga amal qilish hamda muntazam tibbiy ko‘rikdan o‘tib turishning muhimligi ta’kidlandi. Fuqarolarga o‘z vaqtida shifokorga murojaat qilish, o‘zini o‘zi davolashdan tiyilish va kasallik alomatlari paydo bo‘lganida tezkor tibbiy yordam olish bo‘yicha tavsiyalar berildi.

Mazkur tashabbus nafaqat tibbiy xizmatdan foydalanish imkoniyatlarini kengaytirish, balki aholining sog‘lig‘iga bo‘lgan e’tiborini kuchaytirish, sog‘lom hayot tarzi bo‘yicha bilim va ko‘nikmalarini mustahkamlashga ham xizmat qilmoqda. Ta’kidlash joizki, bunday bepul tibbiy ko‘rik va maslahatlar kelgusida ham izchil ravishda davom ettirilishi rejalashtirilgan bo‘lib, bu orqali hududlarda profilaktik tibbiyot tizimini yanada faollashtirish hamda aholining tibbiy savodxonligini oshirish ko‘zda tutilgan.