Talabalik — sharafli maqom. Biroq uni saqlab qolish uchun har bir talabadan muayyan mas’uliyat, tartib-intizom va qonunlarga rioya qilish talab etiladi. Amaldagi qonunchilikka ko‘ra, talaba oliy ta’lim muassasasidan quyidagi hollarda o‘qishdan chetlashtirilishi mumkin:

Chetlashtirish asoslari:

1. O‘z xohishiga binoan — talabaning shaxsiy arizasi asosida;

2. O‘qishni boshqa oliy ta’lim muassasasiga ko‘chirish munosabati bilan;

3. Salomatligi tufayli — maxsus tibbiy komissiya xulosasiga ko‘ra;

4. O‘quv intizomini yoki ichki tartib-qoidalarni buzganligi uchun;

5. Bir semestrda 74 soatdan ortiq darsni uzrsiz qoldirgani sababli;

6. To‘lov-kontrakt shartlari asosida o‘qiyotgan talabalar uchun — belgilangan muddatda o‘qish uchun to‘lovni amalga oshirmagan taqdirda;

7. Sud qarori bilan ozodlikdan mahrum etilganligi sababli;

8. Talabaning vafot etganligi aniqlangan hollarda.

   ---

   Harbiy xizmatni o‘tash, salomatligini tiklash, homiladorlik va tug‘ish, shuningdek bolalarni parvarish qilish ta’tillari davrida talabaga Oliy va o‘rta maxsus ta’lim vazirligi tomonidan tasdiqlangan tartib asosida akademik ta’til berilishi mumkin. Belgilangan muddatlarda fanlarni o‘zlashtira olmagan (akademik qarzdor bo‘lgan) talaba oliy ta’lim muassasasi rektori buyrug‘i bilan kursdan qoldiriladi.

Eslatma: Talabalar O‘zbekiston Respublikasi qonun hujjatlari, oliy ta’lim muassasasi nizomi va ichki tartiblariga rioya qilishi shart. Har qanday chetlashtirish qarori asosli ravishda, hujjatlar bilan tasdiqlangan holda amalga oshiriladi.